ក្រុមហ៊ុនពីរបន្តចុះកិច្ចសន្យាផលិតកម្មនិងផ្គត់ផ្គង់ស្រូវសរីរាង្គជាមួយសហគមន៍ក្នុងខេត្តព្រះវិហារ

AKP ភ្នំពេញ ថ្ងៃទី​២៤ ខែសីហា ឆ្នាំ២០២៣ ​-- ក្រុមហ៊ុនពីរគឺក្រុមហ៊ុនអេមរុរ៉ាយស៍​និងក្រុមហ៊ុនហ្គោលដិនរ៉ាយស៍ បានបន្តចុះកិច្ចសន្យាទិញលក់ស្រូវសរីរាង្គជាមួយនឹងសហគមន៍កសិកម្មនៅក្នុងខេត្តព្រះវិហារ  កាលពីថ្ងៃទី ២៤ ខែ សីហា ឆ្នាំ​២០២៣ នេះ ។

ពិធីនេះត្រូវបានរៀបចំឡើងនៅសាលប្រជុំមន្ទីរកសិកម្ម រុក្ខា ប្រម៉ាញ់ និងនេសាទខេត្ត ក្រោមអធិបតីភាព ឯកឧត្តម អ៊ុក គឹមសាន អភិបាលរងខេត្ត លោកឧកញ៉ា សុង សារ៉ន អគ្គនាយកក្រុមហ៊ុនអេមរុរ៉ាយស៍ លោកស្រី សៅ សុនិតា អគ្គនាយករង ក្រុមហ៊ុនហ្គោលដិនរ៉ាយស៍ អង្គការដៃគូរអភិវឌ្ឍន៍ មន្ទីរពាណិជ្ជកម្មខេត្ត សហភាពសហគមន៍កសិកម្មព្រះវិហារមានជ័យ ថ្នាក់ដឹកនាំសហគមន៍កសិកម្ម និងកសិករជាក្រុមផលិតជាច្រើនរូបទៀត។

លោក ពឹង ទ្រីដា ប្រធានមន្ទីរកសិកម្មខេត្តព្រះវិហារ បានបញ្ជាក់ថា សហភាពសហគមន៍ កសិកម្មព្រះវិហារមានជ័យ គឺជាសហភាពដំបូង ដែលបានបង្កើតឡើងក្នុងព្រះរាជាណាចក្រ កម្ពុជា ក្នុងខែមេសា ឆ្នាំ២០១៦ មានសមាជិកសរុបចំនួន ២៥សហគមន៍ ជាមួយនឹងកសិករ ចំនួន ៥ ៤០៣គ្រួសារ ដែលមានទីតាំងនៅស្រុកទាំង៧នៃខេត្តព្រះវិហារ ហើយទស្សនៈ វិស័យរបស់សហភាពគឺ “កសិករនៅខេត្តព្រះវិហារ នឹងមានជីវភាពធូរធារស់នៅ ប្រកបដោយ ភាពរុងរឿង និងសេចក្តីថ្លៃថ្នូរ”។

លោកបានបន្តថា សម្រាប់ពិធីចុះហត្ថលេខានាពេលនេះ គឺធ្វើឡើងដោយក្រុម ហ៊ុនហ្គោលដេនរ៉ាយស៍នឹងទទួលទិញស្រូវសរីរាង្គចំនួន ១ ២០០តោន ពីសហគមន៍កសិកម្ម ចំនួន ៧ ដែលមានអ្នកផលិត ១ ០០០គ្រួសារ ហើយក្រុមហ៊ុនអេមរុរ៉ាយស៍ នឹងទទួលទិញស្រូវ សរីរាង្គប្រភេទស្រូវស ចំនួនប្រមាណ ១ ០០០តោន ពីសហគមន៍កសិកម្មចំនួន៤ ដែលមានអ្នកផលិត ៥០០គ្រួសារ ដែលជាកិច្ចសន្យាទិញបន្ថែមលើបរិមាណដែលបានចុះហត្ថលេខាកាលពី ខែមិថុនាកន្លងមកថ្មីៗនេះ។

លោកឧកញ៉ា សុង សារ៉ន បានឲ្យដឹងថា ឆ្នាំ ២០២៣នេះ គឺជាឆ្នាំទី៩ហើយ នៃការចុះកិច្ចសន្យាបញ្ជាទិញស្រូវសរីរាង្គពីសហគមន៍កសិកម្មក្នុង ខេត្តព្រះវិហារ។ លោកក៏បានប្ដេជ្ញាខិតខំប្រឹងប្រែង យកចិត្តទុកដាក់ខ្ពស់ ក្នុងការជម្រុញការផ្សព្វផ្សាយ និងនាំចេញអង្ករសរីរាង្គខេត្តព្រះវិហារ ឆ្ពោះទៅកាន់ទីផ្សារពិភពលោកឱ្យកាន់តែទូលំទូលាយ និងខ្លាំងក្លាបំផុត ក្នុងគោលដៅធ្វើយ៉ាងណាឱ្យអង្ករព្រះវិហារ កាន់តែមានកេរ្ដិ៍ឈ្មោះល្បី នៅឆាកអន្ដរជាតិ។

ដោយឡែកឯកឧត្តម អ៊ុក គឹមសាន បានឲ្យដឹងថា រាជរដ្ឋាភិបាលបន្តវេន បាននឹងកំពុងសិក្សាលើការធ្វើពាណិជ្ជកម្ម ដើម្បីស្វែងរកទីផ្សារដោយការនាំចេញផលិតផលកសិកម្ម របស់ព្រះរាជាណាចក្រកម្ពុជាទៅកាន់ទីផ្សារពិភពលោក ហើយកសិកម្ម គឺនៅតែជាឆ្អឹងខ្នង នៃការអភិវឌ្ឍន៍សេដ្ឋកិច្ចជាតិ ហើយខេត្តព្រះវិហារ គឺជាខេត្តគោលដៅនៃវិស័យកសិកម្ម។ ឯកឧត្តម ក៏បានធ្វើការវាយតម្លៃខ្ពស់ ចំពោះកិច្ច ខិតខំប្រឹងប្រែងសហការគ្នាបានយ៉ាងល្អពីគ្រប់ភាគី ពាក់ព័ន្ធ ដោយមានការសម្របសម្រួលពីមន្ទីរកសិកម្ម រហូតឈានដល់ការសម្រេចបានជាបន្ដ បន្ទាប់នូវក្នុងក្របខណ្ឌកសិកម្មតាមកិច្ចសន្យា ដែលអាចចាត់ទុកថាជាខ្សែបន្ទាត់ ឬជានិតិវិធី សម្រាប់ឲ្យភាគីអ្នកផលិត និងអ្នកបញ្ជាទិញដើរព្រមគ្នា ឆ្ពោះទៅទិសដៅមួយយ៉ាងជាក់លាក់ ពិតប្រាកដ តម្លាភាព សច្ចភាព និងជំនឿទុកចិត្តគ្នា ដោយឈរលើគោលការណ៍សំខាន់ ៣គឺ៖ ធានាបាននូវបរិមាណផ្គត់ផ្គង់ប្រកបដោយនិរន្តរភាព គុណភាព ផលិតផល ធានាបាននូវតម្លៃ សាមគ្គីភាព កិច្ចសហការ ជំនឿទុកចិត្ត និងផ្ដល់ផល ប្រយោជន៍ឱ្យគ្នាទៅវិញទៅមក ដើម្បី ជម្រុញឲ្យវិស័យកសិកម្ម នៅក្នុងខេត្តព្រះវិហារ នឹងក្លាយជាកសិកម្ម បែបសរីរាង្គចាប់ពីមូលដ្ឋាន រហូតដល់ទីផ្សារចរាចរផលិតផល ដើម្បីសម្រេចបាននូវគោលនយោបាយ ជម្រុញផលិតកម្ម ស្បៀង និងការនាំចេញរបស់រាជរដ្ឋាភិបាលកម្ពុជា ជួយបង្កើននូវកំណើនសេដ្ឋកិច្ចជាតិ កាត់ បន្ថយភាពក្រីក្ររបស់ប្រជាពលរដ្ឋ។

សូមបញ្ជាក់ថា នៅទូទាំងខេត្តព្រះវិហារ ការងារបង្ករបង្កើនផលស្រូវរដូវវស្សាឆ្នាំ២០២៣ បានអនុវត្តន៍ផ្ទៃដីភ្ជួររាស់បាន ចំនួន ១០០ ០៥៩ហិកតា និងផ្ទៃដីដែលបានព្រោះ ស្ទូង និងបុក ដាំ មានចំនួន ១០០ ៣០១ ហិកតា លើផែនការ ៩៩ ៨១៧ហិកតា ស្មើនឹង ១០០,៤៨%។

ការបង្ករបង្កើនផលដំណាំរួមផ្សំ ដំណាំកសិឧស្សាហកម្ម និងដំណាំឈើហូបផ្លែ គិតត្រឹម ថ្ងៃទី ១៥ ខែសីហា ឆ្នាំ២០២៣ អនុវត្តន៍បាន ៨៤ ០៣៧ ហិកតា នៃផែនការ ៨២ ៣១៥ ហិកតា ស្មើនឹង ១០២,០៩% ។

ដោយៈ ហេង ចេស្តារ